Basa Sunda

PAPADON LOS KA KOLONG

Ku H. Muchsin Al-Fikri, M.I.Kom.

PAPADON los ka kolong hartina cidra jangji, teu nedunan jangjina. Kawas anu dilakukeun ku Présidén Jokowi. Nalika kampanye mah loba pisan jangji-jangji aramis, tapi dina kanyataanana mah sabalikna. Harga sembako marahal, tarif dasar listrik nérékél terus, lahan gawé kalah dibikeunan ka bangsa Asing. Éta pisan anu nyababkeun kiwari mayoritas rakyat Indonésia hayang ngaganti Présidén.

Sapertos anu  didugikeun ku Diréktur Risét Média Survéi Nasional (Médian) Sudarto, permasalahan ékonomi jadi salah sahiji faktor anu nyababkeun masarakat mikahayang Joko Widodo salaku présidén diganti dina pilprés 2019.

“Ti imiti sembako mahal, pagawéan hésé, ékonomi sulit, nepika tarif listrik jadi faktor utama masarakat hayang ngaganti Jokowi ku pamingpin séjén”, saur Sudarto sabada ngarilis hasil survéi éléktabilitas kandidat di Cikini, Jakarta Pusat dina poé Senén, 16 April 2018.

Survéi Médian nuduhkeun masarakat mikahayang Jokowi diganti ku tokoh séjén dina pilprés 2019. Tina éta survéi, 46,4 persén respondén hayang Jokowi diganti.

Jumlah éta saeutik leuwih loba tinimbang réspondén anu milih Jokowi mingpin deui, nyaéta 45,22 persén. Aya 8,41 persén réspondén anu milih teu ngajawab éta pertanyaan. Sudarto nyebutkeun hasil survéi ieu jadi pépéling pikeun Jokowi. “Warning kuning kemérahan pikeun Jokowi”.

Ari jalma mah bakal aya ajénna téh lamun nyekel jangjina. Lamun jangjina geus teu bisa dicekel tangtu geus teu bisa diharepkeun. Komo lamun eunteupna kanu jadi pamingpin. Kacida bahayana lamun hiji pamingpin geus wani jalir atawa cidra tina jangjina. Sabab dina jangji pamingpin bakal ngabaud jutaan malah ratusan juta manusa.

Ku kituna, dina agama Islam cidra kana jangji kaasup tilu sipat munafiq. Ieu sipat papadon los ka kolong wajib dijauhan ku para pamingpin.

Jangji, numutkeun kamus Bahasa Indonésia mangrupa ucapan anu nétélakeun kasanggupan jeung kasayagiaan pikeun migawé hiji perkara. Jangji mangrupa hiji perkara anu kudu dijaga, satungtung éta jangji teu boga tujuan pikeun migawé dosa tur ingkar ka Alloh SWT. Malahan jangji bakal dipénta pertranggung-jawabanna ku Alloh SWT (Q.S. Al-Isro: 34).

Tabé’at resep kana sipat papadon los ka kolong ngarupakeun bukti hiji jalma teu iman sarta geus jadi bagian tina kamunapékan. Cag! ***binadakwah/dewandakwahjabar.or.id

Comments
To Top