Basa Sunda

AYA DINA SIHUNG MAUNG

 

AYA dina sihung maung téh ngandung harti ku lantaran loba kawawuh jeung gegedén. Pas dina aya karerepet atawa kaperluan penting gampang naker meunang pitulungna. Komo di urang mah nalika budaya primordialisme atawa rasa éwuh pakéwuh masih kénéh kentel, nya deukeut jeung gegedén téh sok dijadikeun tanggelan pikeun nyalametkeun diri tina jeratan hukum.

Dina usum Pilprés kawas kiwari mah, teu saeutik para tokoh jeung inohong anu satadina vokal majuangkeun kaadilan tur aspirasi ummat, ngan ku sabab hayang salamet tina kasus anu meulit dirina, nya buru-buru pindah haluan luncat ka golongan musuh anu keur nyekel kakawasaan. Harepanana manéhna bisa disalametkeun tur kasusna bisa di SP3 alias dieureunkeun. Éta disebutna Aya Dina Sihung Maung.

Saperti anu kaalaman ku Ali Muchtar Ngabalin, Tuan Guru Bajang Zaénal Majdi jeung Ustadz Yusuf Mansur.Ngabalin dina Pilprés 2014 kaasup politisi anu vokal ngadukung Prabowo. Tapi dina Pilprés 2019 manéhna luncat jadi pendukung Jokowi. Malahan manéhna jadi pihak anu pangtarikna nyerang kubu Prabowo. Ngabalin disebut-sebut ku Idrus Marham tersangka Korupsi minangka salah sahiji pihak anu narima aliran duit haram nalika dirina jadi Ketua BKPRMI (Badan Kerjasama Pemuda Remaja Masjid se-Indonesia. Ku sabab aringgis kasusna dibolékérkeun ku KPK, nya manéhna buru-buru pindah haluan jadi penjilat Jokowi kalayan ngababi buta nyerang ka pihak anu kritis ka Présidén. Ngabalin geus Aya Dina Sihung Maung.

Lian ti Ngabalin si Kutu Loncat, aya ogé tokoh ti Nusa Tenggara Barat. Katelahna TGB alias Tuan Guru Bajang Zainul Majdi. Dina aksi 212 TGB digadang-gadang jadi Waprés Prabowo. Ku sabab TGB dianggap Gubernur anu sholéh tur hafidz Qur’an lulusan Al-Azhar Kairo Mesir. Tapi sababaraha bulan méméh penetapan Caprés, umat Islam colohok ngadéngé statemen TGB anu muja-muji Jokowi tur manéhna siap jadi Timsés Jokowi.

Robahna sikep TGB diprédiksi ku sabab dirina keur nyanghareupan kasus korupsi anu ngalibetkeun dirina. Saperti dibéwarakeun, yén Komisi Pemberantasan Korupsi (KPK) keur menyelidiki dugaan korupsi anu dilakukeun Gubernur Nusa Tenggara Barat (NTB) Tuan Guru Bajang (TGB) Zainul Majdi dina kasus divéstasi Newmont Nusa Tenggara. TGB diduga narima aliran dana divéstasi periode 2009-2013.

Ngagandéng Pusat Pelaporan Analisis dan Transaksi Keuangan (PPATK), KPK manggihan dugaan aliran dana ti PT Recapital Asset Management ka rékening Bank Syariah Mandiri milik TGB senilai Rp.1,15 miliar dina 2010. KPK ngaduga éta duit aya patalina jeung pembelian 24 persén saham hasil divéstasi Newmont ku PT Multi Daerah Bersaing dina Novémber 2009. TGB aya dina sihung maung.

Nyakitu deui anu dilakukeun ku Ustadz Yusuf Mansur. Ummat dikagétkeun ku manuver Ustadz Yusuf nalika inyana nepungan Cawaprés nomor 01 K.H. Ma’ruf Amien. Ceuk Ma’ruf, Ustadz Yusuf Mansur siap jadi Timsés pasangan nomor 01.

Ustadz Yusuf Mansur kiwari keur nyanghareupan kasus penipuan alatan laporan sababaraha jama’ahna anu ngarasa katipu ku program invéstasi Sang Ustadz. Ratusan Milyar anu dihimpun ti jama’ah béjana macét. Lian ti éta dibéjakeun ogé Ustadz Yusuf keur kongsian jeung anakna Jokowi dina ngawangun bisnis. Ustadz Yusuf katinggalna tos Aya Dina Sihung Maung. Cag! *** H. Muchsin Al-Fikri, S.Sos., M.I.Kom./ Bina Da’wah No. 463

 

Comments
To Top